ТАЛАНТТЫЛАР ТӨРГЕ ОЗДЫ
Қармақшы ауданында Елбасының «Болашаққа бағдар: рухани жаңғыру» бағдарламалық мақаласы аясында конференция мен өнер байқауы өтті.«Рухани жаңғыру – ұрпақ игілігіне бағытталған жол» тақырыбындағы халықаралық ғылыми-тәжірибелік конференцияның және «Ұлы дала елінің өнерлі де өрелі, талантты ұрпағымыз» атты балалар өнер байқауының өтуіне халықаралық Қазақ творчестволық бірлестігінің Қармақшы ауданы бойынша өкілетті директоры А.Өткелбаева ұйытқы болды. Қармақшы аудандық білім бөлімінің қолдауымен өткен шараға мектеп оқушылары мен аудандық Оқушылар үйінің үйірме мүшелері қатысып, бақ сынасты.
Конференцияны «Бейбітшілік әлемі» халықаралық Қазақ творчестволық бірлестігінің президенті Ә.Нұрманов ашып, балалар шығармашылығы жайында кеңінен сөз қозғады.
– Мақсатымыз – ұстаздармен оқушылардың интеллектуалды шығармашылығының дамуына үлес қосу, жасөспірімдерді ғылыми зерттеу және жобалау жұмыстарына баулу, олардың ғылыми жетістіктері мен біліктілігін арттыруға ықпал ету, – деді ол.
Байқауда жүзден жүйрік, мыңнан тұлпар шыққан талантты өрендер бірлестіктің бағалы сыйлығы, төсбелгісі, алғыс хатымен марапатталды.
