Kyzylorda-News.kz

Шиелі аудандық орталық кітапханада «Жастар ресурстық орталық» КММ-сі және орталық кітапхананың ұйымдастыруымен Елбасының «Болашаққа бағдар: рухани жаңғыру» бағдарламасын жастар арасында насихаттау мақсатында, күй өнерінің ақтаңгері атанып, бірнеше мәрте республикалық, халықаралық күй фестивальдарының жеңімпазы Ташимов Әділбек Ахметханұлының аудан жастарымен кездесу жиыны өтті.

 Кездесу жиында күйшінің жеткен жетістіктері, өмір жолы, күйшілік өнердің шығу тарихы, кейіпкердің өмірдегі ұстазы туралы кең көлемде ақпарат беріліп, домбырадан күмбірлеген күй төгілді. Әділбек Ахметханұлы туған жеріне өзінің айқын мақсатпен келгенін айтып, Шиелі аудандық мәдениет үйі жанынан үлкен оркестор құру жоспары барын да жасырмады. Жиынға жиналған жастардың сұрауы бойынша, Нұрқисаның «Әлқисасы», «Ақсақ құлан» т.б күйлері орындалды.

Жастар келген қонаққа өздерін толғандырған сауалдарын қойып, жауаптар ала білді.

Шара соңына қарай күйші Әділбек Ахметханұлына құрмет білдіріліп, иығына шапан жабылып, кітаптар сыйға берілді.