Kyzylorda-News.kz

 

    Мәскеуде ашылған дельфиндер шоуы – Қызылордада. Қарағанды қаласында жұмысын бастаған өнерлі ұжым гастрольдік сапармен барлық қаланы араламақ, - деп хабарлады «Қоғам» телеарнасы.
    Ресейлік жаттықтырушылар қолға үйретілген дельфиндермен жұмыс жасайды. Қонақтардың арасында Лера есімді алып кит, күлгін-күміс түсті егіз дельфиндер, теңіз мысығы бар. Теңіз сұлулары алдымен шеңберден өтіп, балалар добы арқылы түрлі ойын өрнегін көрсетеді. Дельфинмен сөйлесудің адам денсаулығына тигізер пайдасы мол.
    Дельфин терапиясы теңіз жануарлары бөліп шығаратын ультрадыбысты толқындардан құралады. Сонымен қатар адам теңіз суына түскенде қимыл-қозғалысы жиілей түседі. Бұған психологиялық әсерін қоса түсіңіз. Бұл қалай жүзеге асады? Дельфиндердің мейірімділігі соншалық, бассейндегі адаммен бірінші болып «тілдесуге» тырысады. Науқаспен суда бірге жүзіп, түрлі ойын ойнаған соң таңбалы ақпаратпен алмасады. Нәтижесінде әсері өте күшті деген дәрілерді алмастырады деседі дәрігерлер.
    Бірнеше жылдан бері дельфиндердің жай-күйімен танысып жүрген жаттықтырушылар шоу барысында бірге сүңгіп, өнер көрсетті. Сондай-ақ теңіз мысығы мен дельфиндердің өзіндік ерекшеліктеріне тоқталды. Бүгінгі шараға келген балалардың қуанышында шек жоқ.