Kyzylorda-News.kz

 

    Қызылорда топырағында туған танымал әнші Батырхан Шүкеновтың мезгілсіз қайтыс болуына байланысты Қызылорда облысының әкімі Қырымбек Көшербаев оның туған-туыстарына көңіл айтты.
    «Қазақ өнері орны толмас ауыр қазаға ұшырады. Қасиетті Сыр топырағында туылып, өнерімен Қазақстанды ғана емес алыс жақын шетелді мойындатқан хас талант, танымал әнші, дарынды композитор Батырхан бауырымыздан қапыда айрылып қалдық.
    Сыр елі қашан да жыршы мен әншіге кенде болған емес. Батырхан Қамалұлы сол өнер кенішінің бүгінгі көрнекті өкілі, заманауи музыка әлемінің жарық жұлдызы еді. Әнді дәл Батырхандай жүректің қыл пернесіне жеткізіп орындайтын әнші санаулы. Оның саф өнерге деген адалдығы, азаматтық ұстанымы мен тазалығының өзі ерекше құрметке лайықты. Батырхан асқақ музыкант қана емес, парасат-пайымы кемел, пейілі кең, болмысы ерек, адал азамат еді.
    «Қаза – ортақ, қайғы – кезек, өлім-хақ». Жаратқанның әміріне шара жоқ! Қазаққа осындай тума талант ұл беріп, артына өшпес із қалдырған үшін Аллаға шүкіршілік айтамыз. Өзі әнге қосқан «Отан анасы» Батырханды ешқашан ұмытпайды. Марқұмның туған-туыстарына, барша тыңдармандарына Сыр елі, Қызылорда халқының атынан қайғыларыңызға ортақтасып, көңіл айтамын. Алла алдыңнан жарылқасын!
    Бақұл бол, Батырхан бауырым!
    Қызылорда облысының әкімі Қ.Көшербаев