Kyzylorda-News.kz

oldkaz.kyzylorda-news.kz. Нұр-Сұлтан қаласының әкімшілік соты ЭКСПО-2017 халықаралық көрмесі кезінде Қазақстанға келіп, қазақтан сәби сүйген Конго азаматы Моника Камукендж Камганзаға айыппұл салды. Ол 25 мың теңге тұратын айыппұлды төлей алмайтыны үшін Қазақстаннан күшпен шығарылады.

 28 жастағы әйел Қазақстанда қалуға мүмкіндік алу үшін екі жылдан бері күресіп келеді. Оған халықаралық ұйымның заңгерлері көмектесіп жатыр.

Конго азаматы босқын мәртебесін алуға құжаттарын тапсырған, алайда елінде азаматтық соғыс жүріп жатпағандықтан, оның өтініші қабылданбады. Келіншек қазір қызымен бірге Аналар үйінде тұрып жатыр.

Африкалық әйелдің көші-қон заңын бұзғандығы туралы акт сотқа былтыр 28 қыркүйекте түскен. Елордалық әкімшілік соттың шешіміне сәйкес Моника Камукенж Канганза Әкімшілік құқықбұзушылықтар кодексінің 517-бабы 4-бөлімі (Шетелдiктiң немесе азаматтығы жоқ адамның визада не тіркеу кезіндегі көші-қон карточкасында көрсетілген мерзім өткеннен кейін үш тәуліктен асатын уақыт ішінде елден кетпей, Қазақстан Республикасының көші-қон заңнамасын бұзуы) бойынша айыпты деп танылды.

Бұл бап бойынша ақшалай айыппұл немесе елден шығарып жіберу жазасы қарастырылған.

Нұр-Сұлтан соты айыппұлды төлемеген жағдайда, көші-қон полициясы тағы бір рет африкалық әйелді өз отанына депортациялауға әкелетін материалдарды бере алады деп түсіндірді.

Мониканың ақшасы жоқ екені белгілі болды, сондықтан ол біздің елден кеткісі келмесе де елден кетуге моральді түрде дайын.

28 жастағы африкалық әйел Қазақстан астанасына ЭКСПО-2017 көрмесінде жұмыс істеуге келген, алайда республикада жүріп-тұруына мүмкіндік беретін құжатқа қатысты қиындық туындапты. Оған қоса, Конго азаматы қазақтан аяғы ауырлап, алғашқы жарты жылда "Қорғау Астана" орталығында тұрады. Қайырымды жандар босандыру ақысын төлеп, киім-кешегін алып берген. Алты айдан соң Моника Ана үйіне қоныс аударды.