Қызылордада танымал журналист Бибігүл Дәулетбекқызымен кездесу өтеді (ФОТО)

oldkaz.kyzylorda-news.kz. Қызылорда қаласында танымал журналист, белгілі продюсер, ұлттық арналардағы бірнеше бағдарламаның авторы әрі жүргізушісі Бибігүл Дәулетбекқызы оқырмандарымен кездесу өткізеді. Кездесу барысында журналист оқырмандарына өзінің кітабы мен сыйлығын тарту етпек.

Бибігүл Дәулетбекқызы – телевидение саласында он жылдан аса продюсерлік қызмет атқарып келе жатқан танымал журналист.

Ол «Қазақстан» секілді еліміздегі маңдайалды ұлттық арналардағы бірнеше бағдарламаның авторы әрі жүргізушісі.

Бибігүл Дәулетбекқызы көрерменге өзінің ең алғашқы авторлық жобасы «Аялы алақан» бағдарламасымен танылған. Оны тележүргізуші ретінде де атақты еткен осы бағдарламасы.

Бүгінде таңда ол әлеуметтік желілердегі беделді блогерлердің бірі әрі қоғам белсендісі.

Тележүргізушіні танымал еткен тағы бір қыры – оның «Альфонс жігіттің тағдыры» атты хикаяты. Кейіпкерлері өмірде бар адамдар, болған оқиғалар желісімен жазылған хикаят қазіргі таңда оқырмандарға кеңінен таныс. Автор бұл туындысын алаяқ жігітке алданған қыздардың аянышты тағдырлары жастарға сабақ болсын деген ниетпен жазғанын айтады.

Бибігүл Дәулетбекқызы Сыр өңіріне келіп, өзінің қызылордалық оқырмандарымен кездесу өткізбек. Осы кездесу барысында «Альфонс жігіттің тағдыры» атты кітабының тұсаукесер рәсімін өткізеді.

Кездесу ағымдағы жылдың 7 қыркүйек күні сағат 11:00-де қаладағы Н. Назарбаев даңғылы №34 мекен-жайда орналасқан «EMPIRE-M» мейрамханасында өтеді.