Мәскеуде қазақстандық мәдениет қызметкері тұтқындалды
Мәскеуде құқық қорғау қызметкерлері Ресейдегі қазақ мәдениеті қоғамының басшысы Ерназар Нұриевті тұтқындады. Ол үш жыл бұрын Мәскеуде өткен жыр фестиваліне бөлінген қаржыны жымқырды деп айыпталған. Бұл туралы НТВ телеарнасы хабарлады.
2016 жылы қала билігі "Алтын күз" атты қазақ ән фестиваліне шамамен 2 миллион рубль бөлген еді. Алайда ол қаражаттың барлығы бірдей өз мақсатына жұмсалмаған. Мысалы, келісімшарт бойынша сайыстың финалына өткендер Мәскеу маңындағы қонақ үйде тұруы керек болатын. Бірақ тексеру кезінде фестивальге қатысушылардың ешқайсысы қонақ үй жалдамағаны белгілі болды. Ал есепте қонақ үй шығыны үшін ақша төленгені көрсетілген.Жалпы, іс материалдары бойынша, Нұриев 400 мың рубльді жымқырды деп айыпталып отыр.
Қазақ мәдени қоғамы басшысы өз үйінде тұтқындалған. Тінтуге барған ЖҚАЖ-дың шұғыл әрекет тобы мен сарбаздарына Нұриев есік ашпай, олар күш қолдануға мәжбүр болған. Пәтерді тінту барысында үйден басы артық ақша табылмаған, бірақ тергеушілер ол арадан қажетті басқа дәлелдерді анықтаған.
"Әзірге тергеушілер Нұриевтің бюджет ақшасына қол сұғуы бойынша бір эпизодты ғана дәлелдей алды. Ол бойынша Нұриев өз кінәсін мойындады. Қызмет бабын пайдалана отырып, алаяқтық әрекетке барды деген айыппен іс сотқа жолданды. Бюджет ақшасын басып қалмақ болған қазақ мәдени қоғамының басшысы 10 жылға дейін бас бостандығынан айырылуы мүмкін", - делінген ресейлік телеарна таратқан ақпаратта.
