Қармақшыда тұрғындарға «Egov» қызметін пайдалануды түсіндіру тұрақты жолға қойылған (ФОТО)
oldkaz.kyzylorda-news.kz. Қармақшыда аудан тұрғындарына «Қазақстан Республикасының электронды үкіметін» пайдалануды түсіндіру жұмыстары тұрақты түрде жүргізіліп келеді. Тұрғындардың көрсетілетін мемлекеттік қызметтерді сала мамандарының көмегінсіз өздігінен пайдалануды үйрету жұмыстарын «Азаматтарға арналған үкімет» мемлекеттік корпорациясы» КЕАҚ Қармақшы аудандық бөлімшесінің мамандары жолға қойған.
Аталған корпорацияның құжаттарды қабылдау жөніндегі маманы Серікболсын Маденовтің айтуынша, Халыққа қызмет көрсету орталығының мамандары әр күн сайын мақсатты түрде халық көп жиналатын қоғамдық орындарда болып, қарапайым тұрғындарға «egov.kz» сайтының қызметі мен «Telegram-vot» парақшасының жұмыстарын пайдаланудың оңай тәсілдерін үйретіп келеді екен.
Сондай-ақ, аудандағы мемлекеттік және жекеменшік мекемелерге арнайы барып, түрлі сала қызметкерлеріне «Азаматтарға арналған үкіметтің» тарапынан мемлекеттік көрсетілетін қызметтер жайлы кеңінен түсінік беруді әдетке айналдырған.
– Біздің аудандық бөлімшенің мамандары аудан тұрғындарына, мекемелердің қызметкерлеріне мемлекеттік көрсетілетін қызметтер жайлы үгіт-насихат жұмыстарын тұрақты түрде жүргізіп келеді. Бұл, өз кезегінде, тұрғындарға сала мамандарының көмегінсіз үйде отырып-ақ аталған портал қызметін пайдалануға мүмкіндік береді. Әрі Халыққа қызмет көрсету орталығында кезек күтіп, босқа уақыт жоғалтудың алдын алады, – дейді бөлімше маманы Серікболсын Бекболатұлы.
Мәселен, осы аптада бөлімше мамандары Жосалы автобекетіне барып тұрғындарға мемлекеттік көрсетілетін қызметтер жайлы үгіт-насихат жұмыстарын жүргізіп, оны өздігінен пайдалануды түсіндірген. Сол секілді, аудандық емхана қызметкерлерімен де жоспарлы жұмыстар жүргізілген.
Айта кетейік, аталған түсіндіру және үгіт-насихат жұмыстары орталыққа келушілерге де тұрақты түрде көрсетіліп келеді.тұрақты түрде көрсетіліп келеді.
