Сырдария ауданында жаңа мешіт ашылды
oldkaz.kyzylorda-news.kz. Қасиетті Құрбан айт мерекесінің соңғы күнінде Сырдария ауданына қарасты Ақжарма ауылында жаңа мешіт пайдалануға беріліп, ашылу салтанаты өтті.
Имандылық үйінің ашылу салтанатына алыс-жақын елді мекендерден келген жамағаттың қарасы қалың болды.
Тағылымды шарада "Нұр Отан" партиясы Сырдария аудандық филиалы төрағасының бірінші орынбасары Е.Жақып сөз сөйлеп, мешіттің ашылуымен құттықтады. Сонымен бірге, мешіт құрылысын өз қаражаты есебінен жүргізген "Ақжарма и К" серіктестігінің төрағасы Қ.Нұрсейітовке алғысын айтты.
Алла үйінің бой көтеруіне ықпал жасап, күш-жігерін аямаған серіктестік төрағасына ауыл тұрғындары мен қариялар да алғысын білдіріп, ақ батасын берді.
Ғимарат лентасын Сырдария ауданының «Құрметті азаматы» Ш.Сқақов бастаған азаматтар кесті.
