Бейбіт елден береке кетпейді

Қазақстанда осы уақытқа дейін талай өзгеріс, саяси оқиғалар орын алды. Барлығы ел игілігі үшін, жарқын болашаққа, кемел келешекке күні бүгіннен жасалған қадам. Биылғы жыл да еліміз үшін жаман болмады. Дамудың даңғыл жолына түскен мемлекетімізде тарихи оқиға болды. Яғни, кезектен тыс Қазақстан Президенті сайлауы өтті.

Бұл жолғы сайлауға қазақстандықтардың басым көпшілігі атсалысып, өз таңдауларын жасады. Мен де таңдауымды жасадым. Елдің ертеңі үшін жасалып жатқан саяси шаралардың маңызы зор деп білемін. Орталық сайлау комиссиясының мәлімдемесі бойынша ең көп дауыс жинаған Қасым-Жомарт Тоқаев. Ел болашағы үшін қабылданған шешімді дұрыс деп санаймын. Ел Президенттігіне үміткерлердің бәрі тәуелсіздігіміздің тұғырлы, егемендігіміздің мәңгілік болғанын қалаған еді. Ендігі жерде көпшіліктің дауысымен жеңіске жеткен Қазақстан Президенті Қасым-Жомарт Тоқаевтың жас мемлекетімізді өркендету, дамыту жолында, халықтың әлеуметтік әлеуетін көтеру турасында нақты әрі тиімді шешімдер қабылдайтынына үміт артамыз. Ол кісі өзінің мәлімдемесінде де осыны сөз еткен болатын. Халықтың тұрмыс сапасы, жалақы мәселесі ауыз су және тағы басқа да көптен түйіні тарқатылмай жүрген өзекті мәселелерді дер кезінде қолға алатынын жеткізді. Осы уақытқа дейін тек бірлік пен татулықты ту еткен елімізде бұдан әрі қарай да тек бейбітшілік бола берсін дейміз. Біздің тілегіміз бейбіт елдің берекесінің кетпегені. Ел ішінде тыныштық орнай берсін.