Kyzylorda-News.kz

oldkaz.kyzylorda-news.kz. Қорқыт ата атындағы Қызылорда мемлекеттік университетінде «Startap Bolashak: Менің арманым» атты жастар кәсіпкерлігін қолдауға арналған бизнес жобалар байқауы өтті.

 Жастар жылы аясында қолға алынған шара жас кәсіпкерлердің өмір сапасын жақсартуға бағытталған. Байқау студенттердің қызығушылығы зор екенін аңғартты.  

Шараға қатысушылар алдымен «Сала таңдау», «Канвас бизнес-моделі», «Питч презентация» тақырыптарындағы тренинге қатысты. Мұнан соң, менторлармен жұмыс жасады. Менторлардың таңдаған жобалары қорғауға жіберілді. Сәтті қорғалған жобалар ширек финалда Шымкент қаласында, жартылай финал мен ақтық финал Нұр-Сұлтан қаласында телевизиялық форматта реалити шоу күйінде түсірілетін болады. Байқау финалистері өз жобаларына инвестиция бөлдіртуге үлкен мүмкінлік алатын болады.

Айта кетейік, бағдарлама барысында «Бизнес-Start» орталығының жетекшісі Жандос Оразмаханов аталған жоба туралы жиналғандарға толық мағұлмат берді. Одан бөлек, жиынға облыстық ақпараттық технологиялар орталығы, облыстық жастар саясаты мәселелері басқармасы, «Атамекен» Ұлттық кәсіпкерлер палатасы, ҚР Мемлекеттік қызмет істері және сыбайлас жемқорлыққа қарсы іс-қимыл Агенттігінің Қызылорда облысы бойынша мемлекеттік қызмет істері департаментінен келген өкілдері қатысып, жастар тарапынан қойылған сауалдарға жауап берді.