ІТ-парк қызылордалық жастарға стартап жобаларын жүзеге асыруға мүмкіндік беруде
«Цифрлық Қазақстан» мемлекеттік бағдарламасы және Smart city тұжырымдамасы бойынша Қызылорда облысында 37 жоба жүзеге асырылып жатыр, деп хабарлайды oldkaz.kyzylorda-news.kz «Хабар 24» арнасына сілтеме жасап.
Өңір «Ақылды басқару» бағытында пилоттық аймақ ретінде таңдалған. Осы ретте Қызылордадағы ІТ-парк жастардың өз бизнесін ашып, стартап идеяларын іске асыруына жол ашып отыр.21 жастағы Әділет Әли робототехникалық ойларын осы ІТ-паркте жүзеге асыруға мүмкіндік алып отыр. Ол жылжымалы смарт-отау жобасы бойынша еңбектеніп жүр. Бұл мал және егін шаруашылығына өте ыңғайлы баспана әрі транспорт түрі болмақ.
«Смарт қараша үй өзі жүріп-тұрады. Егінге, шаруашылыққа көп пайдасы бар. Киіз үйді жинап, әр жерге тігіп жүрмейді. Өзінің платформасының үстінде тұрады. Керекті жеріне апарады. Бәрін телефон арқылы басқаруға болады. ІТ-паркке келеміз, ой бөлісеміз, бір-бірімізбен тәжірибе алмасып, көп көмегі тиіп жатыр», - дейді жас ғылыми ізденуші Әділет Әли.
«Бұл – жылжымалы метеостанция. Өзі жүріп, жүрген жерінің температурасы мен ылғалдығын өлшей алады. Болашақта бұны әлі де дамыту туралы ойым бар. Мысалға, радиация өлшеу. Осы ІТ-паркке келіп ой жинап, көптеген идеялар алып жүрмін», - дейді жас ғылыми ізденуші Темірлан Хамзат.
3D жүйесімен жұмыс істеуді меңгеріп жүрген жастар жобаларының қолдау тапқанын қалайды. Жалпы, ІТ-паркте 10-нан астам өнертапқыш ғылыми-техникалық еңбекпен шұғылданып жүр.
«Біздің мақсатымыз – кәсіпкерлер мен ІТ-мамандарды ортақ іске жұмылдыру. Қаржысы бар, бірақ жоспарын жүзеге асырушылары жоқ бизнесмендер көп кездеседі. Сондай-ақ нақты жобасы бар, қаржылай қолдауға зәру жастар баршылық. Сол қос тарапты үндестіріп, үйлестіріп жіберсек, бизнестің дамуына септігін тигізер едік», - дейді жоба үйлестірушісі Александр Конзуровский.
Қазіргі таңда аймақта смарт-менеджмент, білім, денсаулық сақтау, тұрғын үй, көлік, қауіпсіздік және бизнес саласында тың жобалар жүзеге асырылу үстінде. Осы ретте ІТ-парктегі коворкинг аймағы, телестудия және 3D принтер құрылғыларында жасалған жобалардың тиімділігі арта түседі.
