Оқушылардың ғарыштық жобалары: қызылордалық оқушылар екі жүлделі орын иеленді
Дәстүрлі ІХ Наурыз кездесулерінде Қызылорда қаласындағы Назарбаев Зияткерлік мектебінің оқушылары екі жүлделі орынды иеленді.
10-сынып оқушысы Қадырхан Ағыбаев ғарыштағы қоқысты жою мәселесін шешуге бағытталған жобасын таныстырды. Жас ғалымның идеясы Жерден лазерлік қондырғысы бар серікті Жерден ұшыру арқылы ғарыш кеңістігін тазалауға бағытталған.
«Бұл аппараттың ерекшелігі жер серігі күн батареясы арқылы үздіксіз жұмыс істейді. Арнайы жазылған бағдарлама ғарыш қоқыстарын анықтауға және оны лазерлік шоқтар арқылы жоюға мүмкіндік береді», – дейді Қадырхан.
Жас өнертапқыш идеясының өзектілігін жоғары бағалаған әділ қазылар Қадырханды жүлделі үшінші орынмен марапаттады. Сонымен қатар арнайы сыйлық ретінде Қожа Ахмет Ясауи атындағы Халықаралық қазақ-түрік университетінің білім Грантын табыстады.
Республика бойынша 200 астам зияткерлік және жалпы білім беретін мектеп оқушылардың басын қосқан ғылыми байқауда қызылордалық зияткер оқушылар ғарыш тақырыбындағы барлығы төрт жоба ұсынды. Жүлдегерлердің арасында Максим Цой мен Алихан Шакиманның зерттеулері де бар. Оқушылар ғарыштық электростанцияның ерекше моделін ұсынды.
«Ғарышқа деген қызығушылық физика пәнін оқудан басталды. Өткен жылдан бері альтернативті энергия көздерін зерттеудемін. Алихан екеуміз ғарышта күннен энергия жинап, оны электроимагниттік сәулелендіру арқылы жерге жеткізетін ғарыштық электр станцияның моделін жасап шығардық», –деп бөлісті Максим.
Балалардың бұл жұмыстары ғарыш инженерия саласының мамандарын ерекше қызықтырды. Байқау қорытындысы бойынша жас жеткіншектер «Ғаламшараралық ұшу» номинациясында жүлделі үшінші орынмен марапатталды.
«Назарбаев Зияткерлік мектептері» дербес білім беру ұйымының ІХ Наурыз кездесулері биыл киелі Сыр өңірінде өткізілді. Тақырыбы «Ғарыш. Ғылым. Интеллект» деп аталды. Дәстүр бойынша жас ғалымдар ғарыш тақырыбында 80-ге жуық жобаларын таныстырып, қорғады. Сонымен қатар, оқушылар Тоқтар Әубәкіров, Талғат Мұсабаев, Айдын Айымбетов секілді атақты қазақстандық ғарышкерлермен кездесіп, NASA, SpaceX ғылыми қызметкерлерінен дәріс алды және Германия мен Қазақстанның астронавтика саласындағы мамандардың шеберлік сыныптарында сабақ алды.
