Еңбегі ерлікпен пара-пар
«КазгерМұнай» серіктестігінің ұжымы Қазақстан Республикасының Тұңғыш Президенті - Елбасы Нұрсұлтан Әбішұлы Назарбаевтың жасаған үндеуін зор тебіреніспен қабылдадық.Елбасының Қазақстан халқы үшін жасаған зор еңбегі қазақстандықтардың жарқын болашағына бағытталғаны баршамызға айқын. Оны біздің ұжым ғана емес барша Сыр мұнайшылары да жақсы біледі және терең сезінеді. Тұңғыш Президент тәуелсіз Қазақстанның іргесін қалап, шекарасын шегендеп, болашаққа бағыт-бағдар беріп, қиын қыстау кезеңде біз секілді ірі кәсіпорындарға қолдау көрсетуінің арқасында қазіргі таңда мыңнан аса адамды тұрақты жұмыспен қамтып отырмыз. Осы орайда, біз Н.Назарбаевқа ел тәуелсіздігін нығайту жолындағы ерен еңбегі үшін алғыс сезімімізді білдіреміз.
Елбасының ел игілігін жақсарту жолындағы жасаған жасампаз жаңалықтары жанымызда мәңгі қала бермек. Өйткені, жас мемлекетіміздің өсіп-өркендеуі мен даму жолында әлемге танылуына Қазақстан Республикасының Тұңғыш Президентінің атқарған еңбегі ұшан теңіз. Алдағы уақытта да зор денсаулық, қажыр қайрат тілей отырып, «Нұр Отан» партиясының төрағасы ретінде халқына қалтқысыз қызмет ете береді деген сенімдеміз.
Мұрат Мұстафаев,
«КазгерМұнай» ЖШС-нің бас директоры
