Байқоңырда әлеуметтік желі арқылы діни алауыздық туғызбақ болған азамат сотталды
Қызылорда облысы Байқоңыр қаласында «Вконтакте» әлеуметтік желісінде діни алауыздықты қоздыруға бағытталған уағыздарды таратқан азамат сотталды, деп хабарлайды oldkaz.kyzylorda-news.kz ҚазАқпаратқа сілтеме жасап.
Жоғарғы соттың баспасөз қызметінен хабарлағандай, Байқоңыр қалалық сотында ҚР Қылмыстық Кодексінің 174-бабының 1-бөлігі бойынша (Әлеуметтiк, ұлттық, рулық, нәсiлдiк, тектік-топтық немесе дiни алауыздықты қоздыру) қылмыстық іс қаралған.«Анықталғандай, сотталушы ұялы телефоны арқылы«Вконтакте» әлеуметтік желісінде парақша ашқан. Сол парақшаға Абдусаллям-Аль уаля уаль баро, Назратуллах абу Марьям және Октам Заурбеков атты авторлардың діни алауыздықты қоздыруға бағытталған әрекеттері бар діни уағыздарды сақтап, оларды 2018 жылдың мамыр айында әлеуметтік желі пайдаланушыларына таратқан», - деп хабарлайды Жоғарғы соттың баспасөз қызметінен.
Сот үкімімен Байқоңыр тұрғыны Қазақстан Республикасы Қылмыстық кодексінің 174-бабының 1-бөлігімен кінәлі деп танылып, 3 жылға бас бостандығы шектелді.
