Күннің суығында жақсылық жасауға асыққан жандар
"Арал Мейiрiмi" Қоғамдық қоры күннің суығына қарамай отбасының қамы үшін көшеде қоғамдық жұмыс істеп жүрген жандар мен базарда сауда жасайтын қала тұрғындарына ыстық шай мен ыстық тамақ үлестірді, деп хабарлайды oldkaz.kyzylorda-news.kz.
Аталған қоғамдық қор өткен жылы рамазан айында орталық мешіттің қолдауымен өз жұмысын бастаған. Қашанда жақсылықтың басы-қасынан табылатын қайырымды жандардың бұл тірліктері көңілге қонымды. Қордың мүшелері басқа да ерікті жастарды өз қатарына қосылуға шақырады.«Қайырымдылық шараларын бастапқы кезде Арал аудандық орталық мешіттің қолдауымен бастағанбыз. Кейін жұмысымызға қолдау білдірген демеушілер де табылды. Сонымен қатар кәсіпкерлік нысандарына қайырымдылық жәшіктерін орналастырдық. Содан түскен қаржыны жағдайы төмен отбасыларға жұмсаймыз. «Бір қолың бергенді екінші қолың көрмесін» дейді. Біздің мақсат бергенімізбен мақтану емес. Ерікті жастарды осындай қайырымдылық істеріне көптеп тарту», - деді қоғамдық қордың жетекшісі Әбілқайыр.
