Қорқыт ата атындағы университеттің ректоры ауыса ма?
Жоғары және жоғары оқу орнынан кейінгі білім беру саласында жұмыс істейтін шаруашылықты басқару негізіндегі мемлекеттік кәсіпорындардың басшыларына кандидаттарды анықтау бойынша Республикалық конкурстық комиссияның отырысы өтті, деп хабарлайды oldkaz.kyzylorda-news.kz.
Оған Парламент депутаттары, орталық мемлекеттік органдардың және үкіметтік емес ұйымдарының өкілдері қатысты. «Кездесу барысында жоғары және жоғары оқу орнынан кейінгі білім беру саласындағы қызметті жүзеге асыратын экономикалық қызмет негізінде мемлекеттік кәсіпорындар басшыларының лауазымдарына үміткерлерді анықтау мәселесі қаралды. Қазақстан Республикасының Білім және ғылым министрі Е.Сағадиев бақылаушы кеңес мүшелеріне конкурстық рәсімдерді қысқаша түсіндіріп, тыңдалымның нәтижесін баяндады», - делінген хабарламада.
Кездесу қорытындысы бойынша Е.Бөкетов атындағы Қарағанды мемлекеттік университетінің ректоры қызметіне Азамат Ыдырысовты тағайындау туралы шешім қабылданды. Ал, А.Байтұрсынов атындағы Қостанай мемлекеттік университетінің ректоры – Алма Досжанова.
Сонымен қатар, abctv.kz сайтының мәліметінше, комиссия Қорқыт ата атындағы Қызылорда мемлекеттік университетінің басшысы лауазымына үміткерді анықтау конкурсы өтпеді деп таныды. Бұл лауазымға қайта конкурс жарияланатын болады.
