Kyzylorda-News.kz

Ұлттық құндылықтарды заңмен қорғайтын уақыт жетті. Ұлттық киім киіп, жартылай жалаңаш тәнін көрсететіндердің ісі енді сотта қаралуы мүмкін, деп хабарлайды ktk.kz.

Заңгер Құрманғазы Мүсір осы мәселе бойынша құқық қорғау мекемелеріне арызданыпты. Құқық қорғаушының айтуынша, оның бастамасын жүздеген адам қолдапты. Сондай-ақ, ол осындай жағдайлар көбейіп кеткендіктен ұлттық құндылықтарымыpды қорғайтын арнайы заң қажеттігін айтады.

Жалаңаштану жарнама ма? Бұл жағдай әлеуметтік желіде жас қыздар арасында жаппай белең алып келеді. Блогер Шырын Наршаеваның сәукелені киіп, жартылай шешінуі жұртшылықтың ашуын тудырғаны белгілі. Этнограф-ғалым Болат Бопайұлы мұның бәрі отбасындағы солқылдақ тәрбие мен әлеуметтік желінің әсері дейді.

Заңгерлер ұлттық құндылықтарымызды қорғайтын заң қабылдайтын уақыт жетті деп есептейді. Қазақтың сәукелесін жалаңаш тәніне киіп, дүйім жұртты шулатқан бойжеткеннің ісі енді сотта қаралуын мүмкін. Осы мақсатта құзырлы орындарға арыз жазған Құрманғазы Мүсір ұлттық тарих пен мәдениетті қорлағаны үшін сараптама тағайындауды сұрап отыр.

Блогер бойжеткеннің осы іс-әрекетінен соң әлеуметтік желідегі пікір екіге жарылды. Кейбірі бойжеткенді айыптаса, ендігі бір тобы ақылға шақыруда.

Қолданыстағы заңдарға сәйкес елімізде ұлттық құндылықтарға қатысты бап қарастырылмаған. Заңгерлердің пікірінше, қалыңдық қана киюге хақылы қастерлі бас киімді қорлайтындар жауапкершілікті сезінетіндей нақты шешім қажет. Сонда ғана мұндай келеңсіздіктерге тоқтам болуы мүмкін.

Айта кетейік, Шырын Наршаева «Астарлы ақиқат» ток-шоуында өз қылығын ар санамайтынын жеткізген еді.