Kyzylorda-News.kz

Жұрт жаңа жылды қарсы алудың қамында қазір. Біреу қаржы шашады. Енді біреулер сол ақшаны жинап алады. Қомақты табысқа кенелетіндер қатарына Аяз ата және Ақшақарды сомдаушылар да кіреді екен. Шаншылған шыршаны шыр айналатын екеуі реті келсе үй-үйлерді аралап та ақша табады. Іздегенге ізет танудан тартына ма, ат түйедей қалайтындар болса, солардың ортасынан табылу да олардың жыл ауысар шақтағы міндеті. Кімдер Аяз Ата болуға құмар немесе бүгінгі Ақшақардың өмірінен не білеміз?

 Жаңа жыл – баланың арман-тілегі орындалатын мереке. Мәселен, отбасы сәбиін қуанту үшін тосынсый жасады. Лапландиядан Санта Клаус келмесе де, Аяз Ата кейпіне енген азаматты шатырдан түсіріп, терезеден кіргізіп алды. Есесіне балақай шат-шадыман. Бұған дейін тек ертегіден ғана естіп жүрген кейіпкерді өз көзімен көрді, сый-сияпатқа кенелді.

 Мұндай қызметтің түр-түрін қазір ғаламтордан оңай табуға болады. Осы іспен айналысатын арнайы мекемелер көп. Тапсырыс берсеңіз болғаны, Аяз Ата кейпіне енген актерлер кез келген уақытта қызмет көрсетуге дайын. Солардың бірі – Мұрат Тұрарбаев. Оның айтуынша, ата-аналар балаларының ертегі әлеміне енуі үшін ақшасын аяп қалмайды. Тапсырыс берушілерде жетіп артылады.

Бұл – Мұраттың сүйікті кәсібі. Мамандығы бойынша музыкант болса да, Жаңа жыл қарсаңында Аяз Ата ретінде қызмет көрсетуден еш қымсынған емес. Айта кетейік, мұндай кәсіппен айналысатындар мереке кезінде барынша табыс тауып қалуға тырысады. Олардың қызметі нарықта орташа есеппен 20 мың теңгеге бағаланады.