Kyzylorda-News.kz

Іскер жандардың арқасында аймағымызда кәсіпкерлік кең қанат жайып келеді. Сондай ізденімпаз кәсіпкердің бірі – жаңақорғандық Жомарт Шәуенов.

Осыдан 4-5 жыл бұрын ол өңірімізде қолданыла бермейтін құрылыс заттарын шығарды. Тұтынушыларының алғысын алып, құрметіне бөленген-ді. Іскер жігіт биылғы жылы да жаңа бастамасымен танылды. Бұрын ол брусчатка аталтын төсеніш плиталардың бірнеше түрін шығарып келсе, биылғы көктемнен бастап еуропалық стандартқа сай лего-кірпіш өндіре бастады.  

– Бұл жаңа технологиямен шығарылатын барынша берік әрі сәнді лего-кірпіш деп аталады. Осы жобамен танысқан соң, оны өзіміздің ауданда шығаруды ойластырдым. Бастамамды Жаңақорған аудандық кәсіпкерлер палатасы бірден қолдады.  Қызылорда облысы мен Түркістан аймағында жоқ екендігін қаперге алған кәсіпкерлік палатасы бизнес-жоба жасауға көмектесіп, қаржыландыруға да тетік тапты.

Осы мекеменің үйлестіруімен Өңірлік инвестициялық орталығынан 2 млн. теңге қаржы алудың сәті түсті. Жеңілдетілген несиеге Ресейден лего-кірпіш пен шлакоблок құятын аппарат, еуроқұрылғы, миксер секілді жабдықтарды сатып алдым. Жаңа технологияны таныса жүріп, игеріп алдық. Қазір тапсырыс бойынша жұмыс істеп жатырмыз, - дейді Ж.Шәуенов.

Кең аула кәсіпкер шығарған өнімдерге толып тұр. Таныса бастадық. Қатар-қатар жиылып тұрған көзтартар әсем заттар әлгі – лего кірпіштер. Мұның бұрынғы қолданылып жүрген кірпіштерден артықшылығы – өте төзімді. Өйткені, кірпіш ойық және дөңбек бедерлерімен шығарылады. Яғни, оларды бір-біріне кигізу арқылы мығымдылығы артады деген сөз. Еуропада сыналып, отандық өнім қатарынан берік орын алуға лайықты лего-кірпіштің шикізаты да жергілікті жерден табылады.

Лего-кірпіш арнайы станокта құйылу барысында 15 тонналық гидравликалық қысыммен нығыздаудан өтеді. Сонан соң арнайы орында бумен кептіріледі. Құрамына таудың ірі құмы, «Шалқияның» жуылған май қиыршағы және белгілі мөлшерде цемент пен арнайы қоспалар қосылады.

Басты ерекшелігінің бірі ретінде тұзданбайтындығын айтуға болады. Демек, сапасы өте жоғары әрі сәулетті. Тапсырыс берушінің талғамына сай кез келген түске боялады. Жаңа өнімге алдымен Түркістан қаласынан келген тұтынушы тапсырыс беріпті. Кәсіпкер азамат 30 мың дана кірпіш өндіріп, тапысырысты орындады. «Лего-кірпішке жергілікті тұрғындардан да сұраныс жоғары», - дейді ол.