Kyzylorda-News.kz

      Соттылығы туралы анықтама беру мерзімі   қазақстандықтар үшін 22 күннен 8 жұмыс күніне дейін қысқартылды. Композиттік қызметті «Азаматтарға арналған үкімет» мемлекеттік корпорациясы ҚР Бас прокуратурасының Құқықтық статистика және арнайы есепке алу комитетімен бірлесе отырып, іске қосты.  

    «Азаматтарға арналған үкімет» мемлекеттік корпорациясы» КЕ АҚ Басқарма төрағасы Абылайхан Оспановтың айтуы бойынша, бұл пилоттық жоба   сотталмағандығы туралы апостиль қойылған анықтама қажет болған қызмет алушыларға ыңғайлы болу үшін іске қосылған. «Бұрын азамат соттылығының бары немесе жоғы туралы апостиль қойылған анықтама алу үшін ХҚКО-ға екі мәрте баратын еді. Бастапқыда - сотталмағандығы туралы анықтама алу үшін,  мұны күтуге 5 жұмыс күні кететін, одан кейін - апостиль қойғызу үшін, оны әзірлеу мерзімі күнтізбелік 17 күн болатын. Осының барлығына шамамен 22 жұмыс күні кететін. Қазіргі кезде азамат апостиль мөртабаны қойғызылған, сотталмағандығы туралы анықтама алуға бір өтініш береді, ал осы қызметті көрсету мерзімі сегіз жұмыс күніне дейін қысқартылды»,- деді  ол.  

    Композиттік қызметті алу үшін азамат жеке басын куәландыратын құжатты (немесе клиенттің мүддесін үшінші тұлға білдірген кезде - нотариалды куәландырылған сенімхат), мемлекеттік баж салығын төлегені туралы түбіртекті ұсынып, сонымен бірге ХҚКО-да өтініш толтыруы тиіс.

    Халықаралық талаптарға сәйкес апостиль мөртабаны қойылған, соттылығының бары немесе жоғы туралы қағаз нысанындағы анықтама мемлекеттік көрсетілген қызметтің нәтижесі болып табылады.