АЛТЫ КҮНДЕ ЖЕТПІС ҚЫЛМЫС АШЫЛДЫ
Аймақта криминогендік ахуалды сейілту, құқық тәртібі мен жол қозғалысы қауіпсіздігін қамтамасыз ету, көшелер мен басқа да қоғамдық орындарда қылмыстарды ескерту және жолын кесу бағытында «Құқық тәртібі» жедел-профилактикалық іс-шарасы өткізілуде, деп хабарлайды Қызылорда ІІД баспасөз қызметі. Алғашқы алты күнде әр түрлі құқық бұзушылықтар жасаған 4431 азаматқа әкімшілік шара көрілді. Оның ішінде, ұсақ бұзақылық жасағаны үшін 243 азамат, қоғамдық орындар мен көшеде масаң күйде жүргені үшін 397 адам, қалалар мен елдімекендердің аумақтарын абаттандыру қағидаларын бұзған 416 тұрғын жауапкершілікке тартылды.
Сондай-ақ, белгіленген жүру жылдамдығын арттырған 344, көлік құралын басқару кезінде телефонды немесе радиостанцияны пайдаланған 472, жолдың қарсы бағытына шыққан 8, қауіпсіздік белдігін тақпаған 679 азаматқа қатысты әкімшілік хаттамалар толтырылып, құжаттар сотқа жолданды.
Есепті мерзімде 70 қылмыстың беті ізі суымай ашылды.
