Kyzylorda-News.kz

 

    Жаңақорған аудан басшылығы мерекелік шараны кент орталығындағы «Тағзым» алаңына гүл шоқтарын қоюдан бастады. Бұл туралы аудан әкімінің баспасөз қызметі хабарлады.
    Соғыс жылдары шейіт болған боздақтар рухына ауданның бас имамы Құран аяттарын бағыштады. Мұнан кейін аудан әкімі Р.Рүстемов Жеңісті жақындатқан соғыс ардагерлері мен жиылған қауымды Жеңістің 70 жылдығымен құттықтады. Одан әрі орталық алаңда отты жылдарды бейнелейтін театрландырылған қойылым қойылды. Салтанатты шара аудандық мәдениет үйінің өнерпаздарының патриоттық бағыттағы әндеріне ұласуда.
    Атаулы күн аясында кенттегі май бекеті мөлтек ауданындағы көшенің біріне Кеңес Одағының батыры Әнуар Әбуталиповтың есімі берілді. «Ер-Нұр Жетістік» ЖШС-нің жетекшісі, жас кәсіпкер Ерлан Ауанов Кеңес Одағының батырына құрмет ретінде көше атауы жазылған ескерткіш белгіні жеке қаржысына жасап берген.
    Айта кетейік, аудан бойынша 12 соғыс ардагері бар. Абыз ақсақалдарымыз шара барысында Жеңіс тойының төрінен табылды. Елордада өткен әскери парадқа Жаңақорған ауданынан Махметжан Сапарбаев пен Найманбай Құрбанов қатысып келді.