Kyzylorda-News.kz

 

    Кеше аудан әкімдігінің мәжіліс залында аудандық қаржы бөлімінің басшысы Ө.Тақырбасов пен жергілікті басылым «Жаңақорған тынысы» газетінің редакторы А.Бекжігітовті зор құрметпен зейнеткерлік демалысқа шығарып салды, деп хабарлайды аудан әкімінің баспасөз қызметі.
    Аудан басшысы Сұлтанбек Тәуіпбаев ел ағаларының жемісті еңбегін, білімділігі мен біліктілігін тілге тиек етіп, ерекше ықылас көрсетті. Құрмет грамотасымен марапаттап, шапан жапты. Салтанатты шараға арнайы келген облыстық «Сыр Медиа» ЖШС-нің бас директоры А.Оңғарбаев білікті басшы бола білген А.Бекжігітовтің елеулі еңбегі мен адамгершілік қасиеті жайында сөз қозғап, облыс әкімінің «Құрмет» грамотасын тапсырды. Мұнан кейін аудан әкімі жаңадан тағайындалған Қ.Әбдуов пен А.Салыбековке ізгі тілегін білдіріп, алдағы жұмыстарына сәттілік тіледі.
    Айта кетейік, аудандық басылым «Жаңақорған тынысы» газетіне бұған дейін "Сыр бойы" облыстық қоғамдық-саяси газетінде арнаулы тілші, «Нұр Отан» партиясы Қызылорда облыстық филиалының бөлім меңгерушісі қызметтерін атқарған Қаныбек Әбдуов тағайындалды. Ал аудандық қаржы бөлімінің басшысы болып бұрын аталмыш бөлімнің сектор меңгерушісі болып қызмет жасаған Салыбеков Адай тағайындалды.