Kyzylorda-News.kz

 

    Жаңақорған аудандық мәдениет үйінде ауданның мақтанышы болған еңбек ардагері Зұлпыхар Мұсахановтың өмір жолы мен қызметіне арналған танымдық конференция болып өтті. Аталмыш конференция З.Мұсахановтың 100 жылдық мерейтойына арналды, деп хабарлайды аудан әкімінің баспасөз қызметі.
    Конференцияға аудан ардагерлері, аудандық мәслихат депутаттары, жастар өкілдері, облыс орталығынан арнайы келген еңбек ардагерінің шәкірттері және З.Мұсахановтың туған-туыстары да қатысты.
    «Ауданымызда елім, жерім деген асыл азаматтарды ардақтап ісін дәріптеу дәстүрге айналған. Ардақты азамат Зұлпыхар ағамыз аумалы-төкпелі заманның талайын басынан өткерген, киліккен ащы мен тұщыны халқымен бірге көрген. Ауданының өсіп-өркендеуіне лайықты үлес қосып, Түгіскен тыңын игерудің бастамашысы болған»,-деді өз сөзінде аудан әкімі С.Тәуіпбаев.
    Конференцияда баяндамалар жасалып, Қызылорда облысының Құрметті қайраткері, Қазақстан Жазушылар және Журналистер Одағының мүшесі А.Сопыбеков З.Мұсахановқа арналған өз арнауын оқыды. Конференция соңынан Еңбек Ерінің құрметіне арналған «Тау тұлға» атты облыстық жазба ақындар мүшайрасының жеңімпаздары марапатталды.
    Шынар БЕКБАН