Kyzylorda-News.kz

 

    Аудан тұрғындарын ауыз сумен қамтамасыз етуге қызмет жасап отырған «Өркен-Сырдария» ЖШС бүгінде тасы өрге домалап келе жатқан іргелі мекемеге айналды. Қазіргі таңда аяғына нық тұрып, заман талабына сай жаңа техникалармен жабдықталып, халыққа қызмет көрсетуді жақсы жолға қойып келеді. Мұнда биылдың өзінде аудан әкімдігінің қолдауымен 10-нан астам жаңа техника алынып, сапқа қойылды. Бұл туралы аудан әкімінің баспасөз қызметінен хабарлады.
    Аудан әкімі Ғ.Қ.Қазантаев бастаған аудандық бөлім басшылары, ардагерлер «Өркен-Сырдария» ЖШС-де болып, оның материалдық-техникалық базасын аралап көрді. Әрбір техникамен жете танысты. Бұлардың барлығы аудан тұрғындарын ауыз сумен қамтуға, кенттің тазалығын қысы-жазы сақтауға ыңғайлы әрі қолайлы екені белгілі болды. Қазіргі таңда кенттің тазалығын сақтауға 100 контейнер қойылған. Мекеме арқылы сатып алынған су жаңа ГАЗ 40-440-2 қоқыс таситын көлігі қосымша техниканы қажет етпей, қоқысты көлікке өзі тиейді. Осы тәрізді жұмыс жасауға тиімді шетелдік жаңа техникалар МКСМ-800 жол тазалығышы, МКСМ-800 қар тазалығышы тракторға тіркелетін тазалық сақтау техникалары мекеме жұмысының қарқынына қарқын қоспақшы.
    Қазіргі кезде ертемен және кешке «Өркен-Сырдария» ЖШС көшелерге су себуді тұрақты жүргізуде. Өткен жылы көшелерде ешқандай қар жамылғысы болған жоқ, уақытылы тазартылып отырды. Ауданның елді-мекендеріне ауыз су беру тұрақты назарда.