Kyzylorda-News.kz

   

    Сырдария ауданы, Н.Ілиясов ауылындағы мәдениет үйінде ақ жаулықты аналар мен әжелер мәдениет үйі қызметкерлері ұйымдастырған бесік жырын орындау мен ертегі айту байқауына қатысты. Бұл туралы аудан әкімінің баспасөз қызметі хабарлады.
    Байқауға қатысушы 10 ардагер аналарға ережелер таратылып, сайыс шарттары таныстырылды. Олар өзін-өзі таныстыру, бесік жырын орындау, сұрақ-жауап немесе мақал-мәтел мағынасын ашу, "Әже маған ертек айтып берші", "Ұршық иіру" кезеңдері бойынша өздерінің өнерлерін көрсете білді. Бұл ардақты аналар арасындағы байқау болғанымен оның берері мол. Ұлттық құндылықтарымыз дәріптеліп, жас толқындар рухани азық алды. Осындай маңызды байқауда әділ-қазылар алқасы әділ бағаларын беріп, бірінші дәрежелі дипломмен Боранкүл Келесованы, екінші дәрежелі дипломмен Күлбаһрам Әлшоразованы және үшінші дәрежелі дипломмен Шолпан Тойбаеваны марапаттады. Белсене қатысқан ардагер аналар да алғыс хаттармен марапатталып, бәріне бағалы сыйлықтар берілді.
    Шынар БЕКБАН