Kyzylorda-News.kz

 

    Тағы бір жағымды жаңалық, бүгінгі қарттар күні мерекесінде Қармақшы ауданы əкімі Сұлтан Мақашов Ұлы Отан соғысының ардагері, майдангер Қуанышбай Бисенбаевқа жаңа пәтердің кілтін табыстады, деп хабарлайды аудан әкімінің баспасөз қызметінен.
    - Ел Президенті де әрқашан еңбектеген баладан, еңкейген қартына дейін ұлықтауды ұлы дәстүрге айналдырып, ұрпаққа үлгі етіп келеді. Қарттарын ардақтай білген елдің рухы үстем, шаңырағы биік. Қазыналы қарттарымызға әрдайым қамқорлық жасау біздің басты парызымыз. Біз тек мереке күндері ғана емес, әрдайым қарияларымыздың әл-ауқаты мен тұрмыс-тіршілігіне назар аударып отыруға тиіспіз. Алдағы уақытта да Сіздер жас ұрпақты тәрбиелеуде бізге жол көрсетіп, аталық ақыл кеңестеріңізді береді деген сенімдемін, - деген аудан басшысы Кармакшылық ардагерлерге құрмет көрсетіп, дастархан жайды.
    «Наурыз шапағаты» фестивалінің лауреаты, ауданның ұлағатты аналары «Әжелер» ансамблі және бірқатар ардагерлерді аудан әкімінің алғыс хатымен марапаттады. Одан әрі аудан өнерпаздары мерекелік ән-шашуыларын ұсынды.
    Айта кетейік, аудан бойынша 6 мыңнан астам қария болса, оның 64-і бастауыш ұйымдарының мүшесі.