Kyzylorda-News.kz

 

    Қазақ, орыс, ағылшын тілдерін жетік меңгерген қабілетті жастарды анықтау және қолдау, тілдік қарым-қатынас мәдениетін қалыптастырып, көп тілді меңгерген тұлғаны тәрбиелеу, қазақстандық патриотизмді нығайту, өзге халықтардың мәдениеті мен тілін құрметтеу мақсатында жастардың тілді меңгеруге деген ынтасын арттыра түсіп, жан-жақты қолдау көрсету мақсатында Қармақшы аудандық мәдениет және тілдерді дамтыу бөлімі мен аудандық білім бөлімінің ұйымдастыруымен 16-22 жас аралығындағы аудан жастарының қатысуларымен «Тіл – тұнық ойдың кәусары» тақырыбында аудандық оқушылар үйінде республикалық олимпиаданың аудандық кезеңі өтті.

    Талапкерлер қазақ тілінде еркін тақырыпта шығарма, ағылшын тілінде эссе жазып, Міржақып Дулатовтың «Күз» шығармасынан орыс тіліне аударма жасау бойынша сынға түсіп, қарым-қабілеттерін сарапқа салды.
    Тартысты да қызықты өткен жарыс қорытындысы бойынша қазылар алқасының шешімімен барлық ереже талаптарына сай болып танылған №199 мектептің мұғалімі Айгерім Шакмарданова бірінші орынды жеңіп алып, облыстық байқауға жолдама алды. Жүлделі ІІ-ІІІ орындарды Т.Көмекбаев атындағы №250 мектеп-лицейінің 10 сынып оқушысы Динара Шаухатбекова мен 11 сынып оқушысы Ислам Досмұратов иеленді. Сондай-ақ, өрелі танымдары мен тағылым тұғырынан танылған №26 мектеп оқушысы Аружан Хамитова, №80 мектеп-гимназия оқушысы Анель Бақытова, №277 мектеп оқушысы Ақбота Мырзаевалар алғыс хатпен және естелік сыйлықтармен марапатталды.