Kyzylorda-News.kz

 

    Биыл қармақшылық диқандар ел сенімі үдесінен шығып, аудан бойынша 81765 тонна Сыр салысын жинап, егілген күріштің әр гектарынан 58,3 центнерден өнім алуды қамтамасыз етті.

    «Жыраулар үйі» алаңында аудан өнерпаздарының аймақ ауылшаруашылығы саласы майталмандарына арнаған қойылымымен басталған мерекелік салтанатты шара аудан әкімі Сұлтан Мақашовтың жыл бойғы еселі еңбектерімен биыл рекордтық көрсеткішке қол жеткізген аудан диқандарын құттықтады. Осылайша биылғы жылғы егін жинау науқанында үздіктер көшін бастаған егіншілер мен ауыл шаруашылығы саласының майталмандарын облыс, аудан әкімінің, және облыстық ауылшаруашылығы басқармасы басшысының алғыс хатымен марапаттап, сый-құрмет көрсетті. Сондай ақ, «Ақтөбе и К» ЖШС-нің төрағасы Нұрлан Іздібаев құттықтау сөз сөйлеп, шаруашылықтың озат күріш сушысы Қайырқұлов Басқынбайға жеңіл автокөліктің кілтін табыс етті.
    Алтын астықты қамбаға молынан құйған Қармақшы ауданы жаз бойғы еңбектерінің нәтижесін қармақшылықтарға да паш етті. Жәрмеңкеде 55 көліктен жалпы құны 17 млн. теңгені құрайтын 493 тонна ауылшаруашылық өнімдері сатылды.