Kyzylorda-News.kz

 

    Аудан әкімі Абзал Мұхимов аралдықтар үшін бұрыннан таныс. Кезінде облыстық білім басқармасында басшы болған азамат әбден тозығы жеткен мектептердің мәселелерін шешуге сергектікпен қарады.
    Сөйтіп, кейбір апаттық жағдайлардағы білім ұяларының ахуалын жөндеуге барынша ықпал жасады. «Жақсының жақсылығын айт, нұры тасысын» деген мақал бар. Көп жыл бойы ескі мектептер тізіміне еніп, оқушыға да, мұғалімдерге де қауіпті болған №248 Тоқабай орта мектебінің қайтадан ірге көтеруіне ең бірінші кезекте осы Абзал Сансызбайұлы атсалысты десек, артық айтқандығымыз емес. Бірнеше рет облыстық комиссияға мән-жайды жолдап, нәтижесінде шұғыл шаралар қолға алынды.
    Енді міне, ауыл жұрты осы бір игілікті істің жемісін көруге жақын. Ауылдың сәніне сән қосқан 140 орындық білім ұясы жаңа оқу жылында оқушыларға есігін айқара ашады деп күтілуде. Соңғы жылдары 4 «Алтын белгі», 1 «Үздік аттестат» иегерін шығарған ұстаздардың еңбегі қайтып, биыл да ҰБТ қорытындысымен 86,5 пайызбен аудан мектептерінің көш басынан көрінді. Иә, алдағы уақытта да аудан халқының ертеңге деген сенімін маздататын жемісті жұмыстар қатары мол болғай деп тілейміз.
    Үргенішбай ҚУАТОВ,
    ардагер ұстаз,
    Тоқабай ауылы