Kyzylorda-News.kz

 

    Бүгін барлық өңірлерде «Соңғы қоңырау» салтанатты жиыны өтуде. Арал ауданындағы салтанатты үлкен шара қаладағы №62 орта мектебінде орын алды. Аудан әкімінің баспасөз қызметінің хабарлауынша, мерекелік жиынға аудан әкімі Абзал Мұхимов, аудандық білім бөлімінің басшысы Бөрі Дабылов, білім саласының ардагерлері мен ұстаздар қауымы, сондай-ақ ата-аналар мен мектеп түлектері қатысты. Алдымен жас түлектерді аудан әкімі А.Мұхимов құттықтап, сөз сөйледі.
    - Бүгін мектеп бітіруші түлектеріміз үшін есте қаларлық күн. Он бір жыл білім шаңырағында оқып, ата-ана мен ұстаздарының қуанышы болған жас түлектерді бүгінгі қуанышты сәтімен шын жүректен құттықтаймын! Ел ертеңі Сіздерден озық ой, нұрлы ақыл, терең білім күтеміз және ел сенімін ақтайды деп үміттенеміз, - деді аудан басшысы.
    Шара барысында бүлдіршіндер орындауындағы әсем ән, 1 сынып оқушыларының аға-әпкелеріне деген лебіз жырлары, «Жыл үздіктерін» марапаттау рәсімі, "Спорт эстафетасын" табыстау рәсімі өткізіліп, мектеп түлектерінің салтанатты шеруі тамашаланды.
    Осынау білім ордасын 20 жыл бұрын бітірген түлектері де бүгінгі «Соңғы қоңырау» кешіне қатысып, мектеп ұжымына деген алғыстарын жеткізді. Сонымен қатар, мектептің әлеуметтік аз қамтылған отбасыларына қаржылай сыйлықтарын табыстады.