Kyzylorda-News.kz

 

    Жеңістің 70 жылдығы қарсаңында Арал қалалық ипподромында ат бәйгесі өтті. Аралда мұндай тұлпарлар додасы жиі ұйымдастырылады. Сәйгүліктер ішінен ең мықтылары қатысып, атбегілер бәйге алаңын қыздыратын нағыз тұлпарларын жарыс алаңына шығарды. Ат жарысқа Арал, Қазалы, Ақтөбе өңірінің шабандоздары қатысты. Елді мекендерден жиналған атбегілер де бұл дүбірлі додадан тыс қалған жоқ. Араларында бәйгеге бірнеше тұлпар қосқандары да болды. Сәйгүліктер «Аламан бәйге», «Тай бәйге», «Құнан бәйге», сондай-ақ қазақтың ұлттық ойындары «Теңге ілуге» де қатысып, жарыс көркін қыздырды.
    Және "Көкпар" ойыны өткізіліп, аралдықтар көкпаршылардың тартысты ойынын тамашалады. Ал ат спортының санатынан үлкен ептілікті, батырлықты талап ететін «Аударыспақ» ойынына ат үстіндегі айқасты жақсы меңгерген, тиянақты дайындығы бар спортшылар қатысты. Салмақтық категория бойынша 20 жастан асқан спортшылар әр түрлі әдістерді қолданып бір-бірін құлатуға тырысты. Үлкен дайындықпен келген балуандар аударысу кезінде өздерінің аттарымен үндестігін сақтай білді.