Kyzylorda-News.kz

 

    Ауыр атлетикадан Қазақстан ұлттық құрамасының мүшелері Қызылордада оқу-жаттығу жиынын өткізуде. Екі дүркін Олимпиада, төрт дүркін әлем чемпионы, даңқты жерлесіміз Илья Ильин бастаған зілтемір шеберлері алдағы байрақты бәсекелерге дайындықтарын пысықтап жатыр.

    Қазақ ауыр атлетикасы бүгінде дүниежүзінің алыптары қатарында. Келер жылы Бразилия астанасында өтетін жаһандық жарыста Олимп шыңын бағындыратын қазақ спортшыларының қарасын көбейту қажет. Бұл ретте мамандар болашағынан зор үміт күттіретін толағай Алмас Өтешовтің де Рио-де-Жанейрода жүлдеге қол жеткізуіне мол мүмкіндігі бар деп санайды. Сондай-ақ жаттықтырушылар тобы Алматыда өткен Әлем біріншілігінде 94 келіде топ жарған Жасұлан Қыдырбаевқа да үлкен сенім артып отыр. Сыр жеріндегі оқу-жаттығу жиынында еліміздің үздік деген 20-ға жуық зілтеміршісі халықаралық жарыстарға қызу дайындық үстінде. Олардың арасынан Азияның құрлықтық бәсекесінде және Америка Құрама Штатының Хьюстон қаласында өтетін әлем чемпионатында өнер көрсететін мықтылар іріктеледі.
    - Биыл құрлықтық және әлем чемпионатынан бөлек, Қытай мен Ресейде лицензиялық сайыстар өтеді. Біз жалпы 2016 жылғы Олимпиадаға 10 жолдама жеңіп алуды көздеп отырмыз. Оқу-жаттығу жиынын Қызылордада өткізуіміз тегін емес. Қызылорда облысы – республика бойынша барлық аудандарда ауыр атлетика үйірмелерін ашқан жалғыз облыс. Қазірде тегеуріні мықты жастар өсіп келе жатқанын байқап отырмыз. Бәсеке бар жерде нәтиже де болары сөзсіз, - деді ауыр атлетикадан Қазақстан ұлттық құрамасының бас бапкері Алексей Ни.