Қызылордалық тоғызқұмалақшылар Қазақстан чемпионы атанды
Ақтөбе қаласында тоғызқұмалақтан ерлер арасында Қазақстан Республикасының командалық чемпионаты өтті, деп хабарлайды oldkaz.kyzylorda-news.kz ақпараттық агенттігі.
Ел чемпионатында Қызылорда облысының командасы жоғары жетістікке жетіп, жалпыкомандалық есепте І орынды жеңіп алды.Команда құрамында ҚР еңбек сіңірген спорт шебері Хәкімжан Елеусінов, спорт шебері Бексұлтан Бостандықов және спорт шеберіне үміткерлер Ермұхамед Әләйдар, Рауан Ыбрай, Асылбек Қаржаубаев, Дамир Ахметов шеберлік байқасты.
Ұлттық ойын ұлықталған дүбірлі додада 4 спортшы, Ермұхамед Әләйдар, Рауан Ыбрай, Асылбек Қаржаубаев, Дамир Ахметов Қазақстан Республикасының спорт шебері нормативін орындады.
Жарысқа 13 команда қатысты, жалпыкомандалық есепте Шымкент қаласы ІІ орын, Павлодар облысы ІІІ орынды иеленді.
Енді ағымдағы жылдың 14-20 ақпан аралығында Көкшетауда әйелдер арасында өтетін ҚР командалық чемпионатына Қызылорда құрамасы қатысады.
