Kyzylorda-News.kz

Облыстық дене шынықтыру және спорт басқармасының басшысы Олжас Акимов манеждің ашылуымен құттықтап, облыс тұрғындарына қызмет көрсететін спорт нысандарының санының жылдан жылға артып келе жатқандығын, бұқаралық спортпен шұғылданушылар қатарының көбейгендігін айтып өтті.

Жеңіл атлетикалық манеждің көлемі – 700 шаршы метр. Төрт жолақты жүгіру жолы, 60 метрге дейін жүгіру алаңы бар. Сонымен қатар, манежде әуесқой жеңіл атлеттерге арналған арнайы клуб жұмыс істейді.

Балалар-жасөспірімдер спорт мектептерінде жеңіл атлетикамен 500-ге тарта спортшы шұғылданады. Былтырғы жылы №4 облыстық олимпиадалық резерв мектебінен триатлон бөлімшесі ашылып, қазіргі таңда 40 спортшы шұғылдануда.

Бұл спорт орталығында жеңіл атлетика, қазіргі бессайыс, триатлон спорт түрлерімен шұғылданатын спортшылар және жеңіл атлетикадан мүмкіндігі шектеулі спортшылар оқу-жаттығу процесін, жиындарын өткізеді, жарыстарға тыңғылықты дайындығын жүргізеді.

Жетістіктерге келетін болсақ, облыс жеңілатлеттері жыл басынан бері ҚР чемпионаттарында 63 медальға ие болды.

Биылғы жылы Жапонияның Гифу қаласында жеңіл атлетикадан өткен Азия чемпионатына Азамат Құлдас пен Светлана Саунина, Аргентинаның Буэнос-Айрес қаласындағы жасөспірімдер жазғы Олимпиада ойындарында Галина Панасенко қатысып, шеберліктерін шыңдады.

Сондай-ақ, қазіргі бессайыстан жерлесіміз Анастасия Кочеткова Азия Кубогының иегері атанды.

Мүмкіндігі шектеулі спортшылар арасында Ислам Салимов, Еламан Жоламан, Қолғанат Бақберген, Нұрсұлтан Көлдеев ҚР чемпионаттарында, халықаралық жарыстарда еліміздің абыройын асқақтатып,  жеңіс тұғырынан көрініп жүрген Сыр спортшылары.

Қайта жаңғыртылған манеж спортшылардың жетістіктерін еселей түсетіні сөзсіз.