ҚЫЗЫЛОРДА ВОЛЕЙБОЛШЫЛАРЫ БІРІНШІ ОРЫНДА
Түркістан қаласында 1999 - 2000 жылдары туған жасөспірімдер арасында волейболдан Қазақстан Республикасының чемпионаты өтті. Астана, Алматы қалалары мен барлық облыстардан 16 команда, 200-ден аса спортшы қатысқан дүбірлі сайыста жерлестеріміз бірінші орынды жеңіп алды. Қызылорда облысының құрама командасының жеңімпаз атануына сырдариялық Дәулет Кенжеғалиев, Дәулет Русланов, Азамат Ордабеков, Мұхамедәли Байтүгелов, Әлішер Өтешов, шиелілік Аят Рамазанұлы, Олжас Сапарбай, Мағжан Ахантай, Нұрлан Сайын, жаңақорғандық спортшылар Зұлфар Мансұр, Ерболат Орынханов, Бекзат Мейрамбек, Қазалыдан Ерсұлтан Оңарбай сынды волейболшылар өз үлестерін қосты.
Команданы жарысқа Болат Рысмахан және Өтепберген Әбдіраманов дайындады. Жасөспірімдер арасында облыстың аға жаттықтырушысы Болат Рысмаханның айтуынша спортшылар енді маусым айында Өскемен, Хромтау қалаларында өтетін Қазақстан Республикасының жазғы чемпионатына дайындалады.
Айта кетейік, осыға дейін Түркістан қаласында 2000-2004 жылдары туылған жасөспірімдер арасында волейболдан өткен ел чемпионатында жерлестеріміз қола жүлдені иеленген болатын.
