ҚЫЗЫЛОРДАДА БОКСТАН АШЫҚ ТУРНИР ӨТТІ
Қорқыт Ата атындағы Қызылорда мемлекеттік университетіне биыл – 80 жыл. Осыған орай 31 наурыз бен 2 сәуір аралығында аймағымызда жоғары, техникалық және кәсіптік білім беру ұйымдарының студент-жастары арасында бокстан университеттің ашық біріншілігінің ашылу рәсімі өтті. Бұл туралы университеттің баспасөз қызметі хабарлады.
Турнирдің қадірлі мейманы – Қазақстан Республикасының еңбек сіңірген жаттықтырушысы, «Сидней» Олимпиадасының Халықаралық дәрежедегі AIBA төрешісі, «Құрмет» орденінің иегері, Қазақстан Республикасы Олимпиадаға дайындық орталығы директорының кеңесшісі Серік Абденалиұлы Абденалиев.
Спорттық шараны университеттің оқу ісі жөніндегі проректоры, бірінші проректоры Абайбек Талғатұлы Жүнісов ашып, жарыс жолындағы азаматтарға сәттілік тіледі.
Университет тарапынан тұңғыш рет ұйымдастырылып отырған бұл шарада боксшылар 8 салмақ дәрежесі бойынша сынға түсіп, спартакиадаға барлығы 9 команда қатысқан болатын.
Жарыс нәтижесінде командалық есеп бойынша Қорқыт Ата атындағы Қызылорда мемлекеттік университетіне І орын бұйырды. ІІ орынды М. Мәметова атындағы Қызылорда гуманитарлық колледжі, ІІІ орынды «Абылай хан» атындағы колледж студенттері жеңіп алды.
