ВОЛЕЙБОЛДАН ЕЛ ЧЕМПИОНАТЫ АЯҚТАЛДЫ
Кеше «Мұз айдыны» спорт кешенінің ойын залында 2001-2002 және 2003-2004 жылдары туылған қыздар арасында волейболдан Қазақстан Республикасының көктемгі чемпионаты аяқталды.
Жарысқа Астана қаласы мен Алматы, Ақтөбе, Ақмола, Жамбыл, Қарағанды, Қостанай, Маңғыстау, Павлодар, Оңтүстік, Шығыс, Солтүстік және Батыс Қазақстан, Қызылорда облыстарынан 36 команда қатысып, бақ сынасты.
Өрнекті ойынымен жанкүйерін қуантқан жарыс нәтижесінде 2001-2002 жылы туған қыздар арасында бірінші орынды СҚО командасы иеленді. Екінші орын иелері қостанайлықтар болса, үшінші орын ШҚО командасына бұйырды.
2003-2004 жылы туған қыздар арасында да бірінші орын тұғырына солтүстік қазақстандықтар көтерілді. Алматы облысының командасы екінші орын алса, үшінші орын тұғырына Қарағанды қаласының спортшылары көтерілді.
