ҚХЛ: «БАРЫС» ПЛЕЙ-ОФФТЫҢ КЕЛЕСІ КЕЗЕҢІНЕ ӨТТІ
Бүгін астаналық "Барыс" xоккей командасы өз алаңында "Трактор" командасын жеңіп, плей-оффтың келесі кезеңіне шықты, деп хабарлайды ҚазАқпарат тілшісі.
Бұл ойында қарсыластар есепті бірінші болып ашты. Алғашқы жиырма минуттық кезеңде "Трактор" командасы Максим Семеновтың ережені бұзғанын пайдаланып, бір ойыншысы артық сәтте шайба соғып кетті. Дегенмен, екінші кезеңде Кэвин Дэлманның шайбасын дұрыс бағыттай білген Владимир Маркелов таразы басын теңестірді. Ал үшінші кезеңде Дастин Бойд "Барыстың" басымдығын арттыра білді. Есеп - 2:1. Матчтың соңында "Трактор" қақпашыны алып тастап, алтыншы xоккейшіні шығарып көрді. Алайда есепті теңестіре алмады. Айта кетейік, осы ойыннан кейін "Барыс" төрт рет жеңіске жетіп, 4:2 есебімен плей-оффтың келесі кезеңіне шығып отыр. Ширек финалда астаналық клуб Магнитогорск қаласының "Металлург" xоккей клубымен кездеседі.
