Kyzylorda-News.kz

    Дарияның басында дамыл жоқ. Ағыны қатты өзен жас пен кәріні талғамай жұтып жатыр. Қызылорда облысында жыл басынан бері 14 адам суға кеткен, деп хабарлайды 24.kz.
    Ата-ана қарауынсыз өздігінен өзен-көлге түскен 3 бала тілсіз жаудың құрбаны болды. Сырдария бойындағы қауіпті аймақтарды құтқарушылар жіті бақылап, ұдайы ескерту үн-парақтарын таратқанымен, тұрғындар тыйым салынған аумақтарға демалыс ұйымдастырып, спиртті ішімдік ішіп, суға түсуін доғарар емес. Көбінесе жастар жағы көпірлер мен бөгеттерден суға секіреді. Сондай-ақ қараусыз қалған және техникалық жарамсыз қайықтарды қолдану да қайғылы жағдайға душар етеді. Құтқарушылар суға түсу ережесін сақтамай, батып бара жатқан 9 адамды ажал аузынан аман алып қалған. Облыстың Шиелі, Сырдария, Жалағаш және Қармақшы аудандарында, тіпті, арнайы құтқару бекеті де жоқ. Мұның өзі қайғылы жағдайдың жиілеуіне әкеліп соғуда.
    - Құтқарушылардың жеке құрамы жеткілікті деп айта алмаймыз. Станция Қызылорда қаласы мен Арал ауданында ғана бар. Құтқарушылар санын көбейту жөнінде жергілікті әкімдікке, министрлікке ұсыныс берілді, - дейді облыстық ТЖД суда құтқару қызметі ММ құтқарушысы Айдын Балманов.