Kyzylorda-News.kz

     «Ұрпақтың ұлықтығы ұстаздың ұлағатымен өлшенеді» деген бар. Білім сапасы мұғалімдер қызметінің жаңашылдығына тікелей байланысты. Оны А.Байтұрсыновтың «Мұғалім қандай болса, мектеп те сондай болмақшы» деген сөзінен де аңғаруға болады.

    Оқушының рухани өсуіне жағдай туғыза алатын, жаңалықтарды қабылдауға даяр, өз әрекетіне өзгеріс енгізе алатын ұстаз ғана бүгінгі талаптарға сай бола алады. Сол себепті ұстаздар қауымына үнемі ізденіс қажет, өзін жетілдірмеген ұстаз жолда қалады.  

    Осы мақсатта №10 дарынды балаларға арналған облыстық «Білім-инновация» лицей-интернатының мұғалімдері Шиелі ауданындағы №45 мектеп базасында өткен «Инновациялық білім беру жолындағы нәтижеге бағыттылық» тақырыбындағы семинарға қатысып, іс тәжірибелерімен бөлісті.

    №45 мектеп – әдістемелік көмек көрсету мақсатында лицей-интернатқа бекітіліп берілген 9 инновациялық мектептің бірі. Лицей-интернат бекітілген магниттік мектептеріне әрдайым қолдау көрсетіп келеді.

    Семинарда лицей-интернаттың қазақ тілі мен әдебиеті пәндерінің мұғалімі Г.Байназар «Сабақта жаңа ақпараттық технологияны тиімді пайдалану: kahoot, guizlet, plickers бағдарламалары» тақырыбында, математика пәнінің мұғалімі Р.Молдабекова «Интеллектум үйірмесінің  баланың логикалық қабілетін дамытудағы ролі» тақырыбында баяндама жасап, өз іс тәжірибелерімен бөлісті. Г.Байназар  семинарға қатысушыларға ipad құралдарымен жұмыс істеп, тәжірибе жасап көруіне жағдай жасады. Kahoot, guizlet бағдарламаларымен ғаламторға кіретін кез келген құрал арқылы жұмыс істеуге болатындығын да айтты. Р.Молдабекова баланың логикалық қабілетін дамытатын ойын түрлері бойынша бірнеше заттарды ала барып, семинарға қатысушылардың ойнап көруіне мүмкіндік берді. Лицей мұғалімдері семинарды ұйымдастырушы №45 мектеп ұжымына, сондай-ақ семинарға қатысушы әріптестерінің жаңа технологияны меңгеруге деген қызығушылығына риза болды.