РЕСПУБЛИКАЛЫҚ БАЙҚАУҒА ҚАТЫСАТЫНДАР ІРІКТЕЛДІ
Абылай хан колледжінде Қызылордада облыстық білім басқармасының ұйымдастыруымен «WorldSkills Kazakhstan» аймақтық іріктеу байқауының жеңімпаздарын марапаттау салтанаты өтті. Ұлттық чемпионаттың аймақтық іріктеу байқауында студенттер «Дәнекерлеу технологиясы», «Сантехника және жылыту», «Кірпіш қалау», «Аспазшы ісі», «Киімдер дизайны және модельдеу», «Желілік және жүйелік басқару», «Слесарлық - іс», «Электромонтаж», «Жүк автокөліктеріне қызмет көрсету», «Шаштараз өнері», «Веб-дизайн» мамандықтары бойынша кәсіби сынға түсті.
Ағымдағы жылы 11 кәсіп бойынша аймақтық іріктеу байқауына жоғары оқу орындарының, жас мамандар мен техникалық және кәсіптік білім беретін оқу орындарынан 75 білім алушы қатысып, жеңімпаздар 8 кәсіп бойынша республикалық кезеңге жолдама алды.
Байқауға оқу орындарының әлеуметтік серіктестік мекемелерінен, кәсіпорындарынан сарапшылар іріктелініп, қазылық жасады.
Қатысушылар мен жеңімпаздарды облыс әкімінің орынбасары, «WorldSkills Kazakstan» аймақтық іріктеу байқауын ұйымдастыру комитетінің төрағасы Руслан Рүстемов, «Нұр Отан» партиясы облыстық филиалы төрағасының орынбасары Әділбек Ерсұлтанов, «Атамекен» облыстық кәсіпкерлер палатасы директорының орынбасары Қожахмет Ілиясов, «ИНТЕГРОСТРОЙ» ЖШС өндірістік техникалық бөлім инженері Нұрдәулет Жанәбіл, Қызылорда облысының білім басқармасының басшысы Бақытжан Сайлыбаев, Қызылорда облысының жастар саясаты мәселелері басқармасының басшысы Еркебұлан Меңілбаев құттықтап, алдағы республикалық байқауға қатысатын студенттерге сәттілік тіледі.
Биылғы жылғы байқау жеңімпаздары үстіміздегі жылғы 2-5 мамыр аралығында Астана қаласында өтетін республикалық байқауға қатысатын болады.
