Kyzylorda-News.kz

 

    Бүгін Қызылордада Батырхан Шөкенов атындағы «Отан – Ана» республикалық әншілер конкурсы басталды. Осыған орай Н.Бекежанов атындағы музыкалық драма театрында қазылар алқасы баспасөз мәслихатын өткізді.

    Конкурсты облыс әкімдігінің қолдауымен облыстық мәдениет, мұрағаттар және құжаттама басқармасы ұйымдастырды. Мақсат – Қазақстан мен Ресей эстрадасының жұлдызы, танымал музыкант, әнші-композитор Батырхан Шөкеновтың ән мұраларын, шығармашылығын кейінгі ұрпаққа кеңінен насихаттау.
    - Республиканың әр түкпірінен 18-30 жас аралығындағы 230 адам қатысуға тілек білдірді. Солардың ішінен 26-сы іріктеліп алынды, - деді басқарма басшысы Ержан Әбдірахманов.
    Әнші, Қазақстанның халық артисі, Мемлекеттік сыйлықтың лауреаты Роза Рымбаева бастаған қазылар алқасының құрамында композитор-музыкант Наджиб Вильданов, композитор, дирижер, музыкант Яков Хан, Қазақстанның еңбек сіңірген қайраткері Рамазан Тайманов, әнші Мәдина Сәдуақасова бар.
    - Қатысушылар ережеге сәйкес әнші репертуарынан және еркін тақырыпта бір-бір әннен орындауы тиіс. Бұл жастар үшін үлкен мектеп болары сөзсіз. Жас орындаушылар Батырханның дейгейіне жетуге талпынуы керек, - Роза Рымбаева.
    Екі күнге созылатын өнер додасының лауреаттары қорытынды Гала-концертте өнер көрсетеді. Айта кетейік, конкурс бұдан былай екі жылда бір рет өткізіледі.
    Назерке САНИЯЗОВА