Kyzylorda-News.kz

 

    Нұрмұхан Жантөрин атындағы Атырау облыстық филармониясының құрылғанына 50 жыл толуына орай, «Нарын» ұлт-аспаптар оркестрі іс-сапармен Қызылорда облысына келді. Бүгін «Сыр медиа» ЖШС жанындағы облыстық коммуникация орталығында өткен брифингте филармония директоры Ғаділ Дүйсенғалиев, оркестрдің бас дирижері және көркемдік жетекшісі Ержан Китаров және филармония әншісі, ҚР Мәдениет қайраткері Ханзада Сақыпова БАҚ өкілдеріне концерттік бағдарламамен таныстырып, мәдениет ошағының жарты ғасырлық тарихы жөнінде әңгімелеп берді.
    Облыстық филармония 1966 жылдың қаңтарында Атырау қаласында қаланған. Бүгінде облыстық филармония құрамында 10 шығармашылық ұжым, 150 талантты музыканттар мен әншілер қызмет атқарады. Олар бүгінде халықаралық, республикалық және облыстық конкурстарды бағындырған талант иелері. Бүгінде филармония әртістері Ресей, алыс және жақын шет елдерде қазақ халқының ұлттық мұрасы мен дәстүрін концерт залында дәріптеп келеді.
    «Филармонияның 60-қа жуық әртісімен ең алдымен Орал, одан кейін Ақтөбе қалаларында өнер көрсеткен ұжым бүгінде Қызылорда жұртына өнерін паш етпек. Одан кейін Шымкент және Алматы қалаларында жалғасын таппақ. Халық аспаптарының керемет дауысын тыңдауға келіңіздер», - деді Ғ.Дүйсенғалиев.
    Концерт бүгін кешкі алтыда Қызылорда облыстық филармонияның концерт залында(бұрынғы теміржолшылар клубында) өтеді.
    Шынар БЕКБАН