Назарбаев Зияткерлік мектебі 5 жылдығын атап өтті
Назарбаев Зияткерлік мектептерінің тыныс-тіршілігімен таныстыру және қызылордалық зияткер оқушылар мен ұжымның 5 жылдық белестері мен білім, ғылым, өнер салаларында жеткен жетістіктерін көпшілікке таныстыру, есеп беру мақсатында Н.Бекежанов атындағы музыкалық драма театрында «Ұлы дала мұрагерлері» атты шығармашылық мәдени іс-шарасы ұйымдастырылды.Театрдың 1-қабатында оқушылардың қолөнер бұйымдарының көрмесі жасақталып, көрермендер дарынды оқушылардың қызығушылықтарына сәйкес дайындалған зияткерлік мектептің 40-тан астам шығармашылық үйірме жұмыстарының өнімдерімен танысты. Ал театрдың 2-қабатында оқушылардың ғылыми жобалары мен инновациялық өнертабыстарының жәрмеңкесі өтті.
Озық ойлы, білімді, зияткер оқушылар дайындаған көрме соңы «Ұлы дала мұрагерлері» атты гала-концертпен жалғасты. Көрермендер мектеп ұстаздары, оқушылар, ата-аналар мен шетелдік мұғалімдердің өнерін тамашалады. Концерт бағдарламасы мектеп жетістіктері, құндылықтар, спорт пен мәдениет саласындағы табыстар, зияткерлік бағыттағы барлығы 5 бөлімді қамтыды.
Концерт соңында мектеп директоры Жұматай Бахыт Әмірханұлы «Назарбаев Зияткерлік мектептері» ДББҰ-ның 10 жылда жеткен жетістіктеріне тоқталып, табысты 5 жылда мектеп ұжымының атқарған елеулі еңбектеріне өз алғысын білдірді. 
