ҚАЙЫРЫМДЫЛЫҚ – ІЗГІ ҚАСИЕТ
Қызылорда еріктілері мүгедек жандарға көлік тасымалын ұйымдастыру үшін қаржы жинауға кірісті. Осы мақсатта олар «Қайырымдылық жүректен жүрекке жетеді» атты концерт ұйымдастырып, онда өздері де өнер көрсетті.
«Қызылорда еріктілері» қауымдастығының жетекшісі Ольга Чебакованың айтуынша өзгеге көмек көрсетуге ниетті жандар қатары күннен-күнге артып келеді.
- Бізде қазір тұтас бір ұжым қалыптасты, - дейді ол. – Өзгенің басындағы қиындыққа енжар қарамайтындардың көптігі қуантады. Осы мақсатта ұйымдастырылған шараның басты мақсаты бимен айналысатын мүгедектер үшін көлік тасымалына қаржы жинау. Олар біздің театр үйірмесінің қойылымдарына қатысады. Дайындық кезінде олардың қиындық тартып жүргенін көрген соң осындай қадамға бардық. Қызылордада инватакси бар. Бірақ ол мүмкіндігі шектеулі жанның бәрін қамти алмайды.
Еріктілер мен мүгедек арбасына таңылған жандардан жасақталған би үйірмесі қазір қаладағы танымал өнер ұжымдарының қатарынан саналады. Олар жастар ресурсы орталығы өткізген түрлі шараларға қатысады. Көрермен ықыласына қанаттанған еріктілер жуырда тағы бір бастама көтеріп, инклюзивті театрдың тұсаукесер қойылымын қойды. Көрермендер назарына Н.Гогольдің «Ревизорынан» үзінді ұсынылды. Қоюшы-режиссері – Талғат Телеубаев.
- Шараға қатысуға біз нашар көретін, әлсіз еститін балаларға арналған мектеп оқушыларын шақырдық, - дейді Т.Телеубаев. – Түрлі конкурстардың лауреаты атанған бұл балалар екі нөмірден қойды. Алда да біздің қатарымызда өнер көрсетуге ниетті жандар аз емес. Біз осы концерт арқылы қоғам назарын мүгедектер мәселесіне аударғымыз келеді.
Еріктілер концерт қоятын залдан қиындық көріп жүргенін айтады. Бұл жолы оларға Қорқыт ата атындағы ҚМУ басшылығы Студенттер сарайын тегін беріпті.
Концерт бұлар күткендегіден де жақсы өтті. Шабыттана ойнаған балалардан көрермендер де ықыласын аяған жоқ. Сал ауруына шалдыққан Нұрай Әбубәкірова билеген үнді биі өнерді шын сүйген жанға ештеңе де кедергі болмайтынын көрсетті.
- Нұрай би үшін жаралған жан, - дейді О.Чебакова. – Оның талабына тәнті болған еріктілер арнайы костюм тігіп берді. Осы концерт оның өзіне, ертеңге деген сенімін ұштай түсті деп білемін.
Концертте «Қызылорда еріктілері» атынан шараны ұйымдастыруға қосқан үлесі үшін мемлекеттік құрылым жетекшілері мен ҮЕҰ өкілдеріне алғыс білдірілді.
