ДИМАШ ҚҰДАЙБЕРГЕН АЗИЯНЫҢ ЕҢ ТАНЫМАЛ ӘНШІСІ АТАНДЫ
Қазақстандық әнші Димаш Құдайберген China Top music Awards шарасында "Азияның ең танымал әншісі" атанды, - деп жазады Tengrinews.kz. Бұл туралы әншінің PR-директоры әрі досы Алпамыс Шаримов хабарлады. Шанхайда өтіп жатқан шараның марапаттау рәсімінде Димаш Құдайберген SOS d'un terrien en détresse әнін орындады. Бұл әнді қазақстандық әнші I am a Singer байқауының бірінші кезеңінде орындаған болатын. Шараға қатысу үшін әншінің әкесі Қытайға арнайы барған екен. Марапаттау рәсімінде Димаш Құдайберген тыңдармандарына қазақ тілінде алғыс айтты. "Ассалаумағалейкүм, құрметті әлеумет! Өте қатты қуаныштымын, қазір. Бұл менің шет елдегі алып тұрған ең алғашқы үлкен сыйлығым. Ең алдымен мен өзімнің ата-анама және де жан досыма көп рақмет айтамын. Және де менің бағымды ашқан, әлемге танытып жатырған "Singer" жобасына алғыс айтамын! Менің қолдап жүретін барша тыңдармандарыма рақмет айтқым келеді! Бар болыңыздар, аман болыңыздар! Бұл тек бастамасы ғана!", - деді Димаш Құдайберген.
