Kyzylorda-News.kz

 

    Өткен жұмада ел Тәуелсіздігінің 25 жылдығына орай «Руханиятты жаңғырту» қоғамдық қоры облыстың колледж студенттері мен лицей, орта мектептің 8-11 сынып оқушылары арасында өткізген ІІІ облыстық «Үздік жас ғалым» байқауын қорытындылады.
    Биыл үшінші рет ұйымдастырылып отырған жас ғалымдар байқауы «Өрлеу» БАҰО» АҚ филиалы Қызылорда облысы педагогикалық қызметкерлердің біліктілігін арттыру институты базасында өтті.
    Дода барысында қатысушылардың тақырыпты қаншалықты терең зерттеп, оны меңгергендігі анық байқалды. Қорғалған жұмыстар мазмұнының ашылуы, ғылыми жаңалығы және дереккөзінің құндылығына қарай әділ бағаланды. Үздіктерді қазылар алқасының мүшелері тарихшы-ғалымдар Дастан Сәтбай, Сәкен Серікбаев және әдебиетші-ғалым Н.Нұрмаханов анықтады. Байқау қорытындысында І орынды әдебиет саласы бойынша М.Мәметова атындағы Қызылорда гуманитарлық колледжінің оқушысы Жанерке Дүйсенова, тарих саласы бойынша Қармақшы ауданынан келген Ү.К.Томанов атындағы №183 орта мектебінің оқушысы Данияр Рахымжанов иеленіп, «Үздік жас ғалым» атанды. Алдағы уақытта үздік мақалалар жинаққа еніп, Тәуелсіздік күні қарсаңында жеке кітап болып жарыққа шықпақ.