Kyzylorda-News.kz

 

    "Мен бұрын да айтқанмын, тағы да айтамын, депутаттық сауалды тек қазақша жолдаймын. Керек адам аудармашы арқылы (құлаққа салатын арнайы құрылғымен) аударып тыңдай жатар, - деді Мәжілістің ең жас депутаты Геннадий Шиповских «Қазақстан-Заман» газетіне сұқбатында.

    Сонымен бірге халық қалаулысы сұхбатқа шақырған телеарналарға қояр басты талабы — мемлекеттік тіл екенін де баса айтты. "Сұхбатқа шақырған телеарналарға қояр басты талабым — мемлекеттік тіл. Сауалға сол тілде ғана жауап беруге дайынмын деп ескертемін. Бұл жерде өзімнің ана тілім — орыс тілін аяққа жығып беріп отырғам жоқ, керісінше, орыстардың да қазақша сөйлей алатынын, сол тілде ойланып-толғануға олардың да шама-шарқының жететінін көрсету. Өзге қандастарыма үлгі болу», - деді ол.
    Айта кетейік, Геннадий Шиповских Қазақстан халқы Ассамблеясының ХХІІ сессиясында елбасы алдында мемлекеттік тілде сөз сөйлеп, елдің ризашылығына бөленген болатын. Жас депутат – Сыр өңірінің тумасы.